Dhuna në familje dhe në përgjithësi dhuna ndaj gruas vazhdon të jetë një dukuri shqetësuese në Shqipëri. Ajo mbetet kryesisht pas dyerve të mbyllura për shkak të mentalitetit që e sheh dhunën si një ҫështje private dhe familiare. Një pjesë e mirë e grave, që janë subjekt i dhunës, vuajnë në heshtje dhe nuk arrijnë dot ta denoncojnë dhe të shkëputen nga cikli i saj. Shoqata Refleksione mbetet e angazhuar fuqimisht në ndryshimin e këtij mentaliteti, në ngritjen dhe forcimin e strukturave institucionale për t’iu përgjigjur rasteve të Dhunës në Familje (DHF) dhe Dhunës me Bazë Gjinore (DHBGJ). Në Shqipëri, pjesa më e madhe e shërbimeve dhe mbështetjes ndaj grave, viktima të dhunës, jepet ne nivel lokal, përmes Mekanizmit të Referimit, i njohur ndryshe edhe si Përgjigja e Koordinuar e Komunitetit për këto raste. Ky raport është realizuar në kuadër të projektit pilot “Monitorim i Mekanizmit të Referimit në nivel lokal për rastet e Dhunës në Familje (DHF) – aktivizëm qytetar për përmirësimin e tij- Gjetje dhe Rekomandime” i zbatuar nga Refleksione në Bashkinë e Lushnjës, Fierit dhe Korçës, mbështetur financiarisht nga Agjensia Zvicerane për Bashkëpunim dhe Zhvilim (SDC) përmes konsorciumit LëvizAlbania. Përfituesit nga ky raport janë: Ministria e Shëndetësisë dhe e Mbrojtjes Sociale, Ministria e Brendshme-Policia e Shtetit-; Ministria e Drejtësisë - Gjykatat, Prokuroritë, Përmbarimi-; qeverisja vendore-bashkitë, institucionet lokale, pjesë e Mekanizmit të Referimit, (MR) përgjegjëse për adresimin e rasteve të DHF, organizata lokale të shoqërisë civile të angazhuara në mbrojtjen e të drejtave të gruas, Agjensitë e Donatorëve ndërkombëtarë të interesuara në reduktimin e dhunës kundër gruas dhe rritjen e demokracisë lokale si edhe vetë shoqata Refleksione dhe organizatat lokale partnere, që morën pjesë në zbatimin e projektit. Projekti ka patur si qëllim të përgjithshëm rritjen e demokracisë vendore nga angazhimi i qytetarëve në parandalimin e rasteve të DHF dhe përmirësimin e Mekanizmit të Referimit . Dhe si qëllime specifike: 1. Monitorimin e Mekanizmit të Referimit në tre Bashkitë e targetuara me anë të Planit Operacional të Monitorimit (POM) , një instrument novator, që u ndërtua nga projekti dhe u përdor për herë të parë në Shqipëri. 2. Angazhimn e komuniteteve lokale në monitorimin/përmirësimin e MR përmes advokimit dhe lobimit për POM, medias sociale & lokale & kombëtare; 3. Krijimi i aleancës me mediat lokale për një përqasje pozitive gjinore në mbulimin mediatik të rasteve të DHF.

MONITORIM I MEKANIZMIT TË REFERIMIT PËR RASTET E DHUNËS NË FAMILJE NË NIVEL LOKAL